КМШга мүчө мамлекеттеринен келген жол кыймылынын жаш тескөөчүлөрүнүн мамлекеттер аралык кароо-сынагы өтүп жатат

Бүгүн, 22-августта Ысык-Көл облусундагы пансионаттардын биринде
Көз карандысыз Мамлекеттер Шериктештигине мүчө мамлекеттердин арасында жол кыймылынын жаш тескөөчүлөрүнүн отряддарынын мамлекеттер аралык кароо-сынагы өтүүдө.

Иш-чара Кыргыз Республикасынын Ички иштер министрлиги жана Кыргыз Республикасынын Билим берүү жана илим министрлиги тарабынан "Жол кыймылынын жаш тескөөчүлөрү" конкурсу жөнүндө жобонун негизинде башка кызыктар ведомстволор жана уюмдар менен биргеликте уюштурулган.

Бул иш - чаранын максаты-Кыргызстан менен КМШ өлкөлөрүнүн ортосундагы мамлекеттер аралык мамилелерди чыңдоо жана балдардын катышуусундагы жол кырсыктарынын алдын алуу жана санын азайтуу, жалпы билим берүү мекемелериндеги жол кыймылынын жаш тескөөчүлөрүнүн ишинин натыйжалуулугун жогорулатуу болуп саналат.

Кароо-сынагына КМШ өлкөлөрүнөн-Беларусь, Казакстан, Россия, Тажикстан, Өзбекстан жана Кыргыз Республикасынын командалары катышууда. Алар өз республикасында 1 жана 2-орундарды ээлеп келген 29 мектеп окуучусунан турган 6 команда.

Мамлекеттер аралык кароо-сынак төрт номинация боюнча өткөрүлүүдө:

- Саптык кароо;
- Жаш жол тескөөчү;
- Келечектеги айдоочу;
- Жол кыймылынын эрежелерин билген чеберлер.

Сынак учурунда жаш тескөөчүлөр жигердүүлүгүн көрсөтүп, жол кыймылынын эрежелери боюнча мыкты билимдерин көрсөтүштү: катардык кадам, саптык ырларды айтышып, дубал гезиттери  сыналып, жол кыймылынын белгилери боюнча суроолорго жооп беришти.

Кароо-сынактын жыйынтыгы иш-чаранын акыркы күнүндө чыгарылат.

Белгилей кетсек, бул мамлекеттер аралык кароо - сынак 24-августка чейин уланат.

ИИМдин Басма сөз кызматы