Нарын ОИИБи: Карыларга камкордук! Милиция кызматкерлери ИИОнун ардагери Турдалы Сулаймановду  үйлүү кылып, кубанычка бөлөдү

13-октябрь күнү Нарын ОИИБнин начальниги А.Жумабековдун, ИИМнин отставкадагы  ардагери Ш.Мамыровдун жана Нарын ОИИБнин Ардагерлер кеңешинин төрагасы К.Кыдыкбаевдин катышуусу менен Ат-Башы районундагы милициянын ардагерине салынган атайын үйдүн ачылышы болду.

Кыргыз Республикасынын ИИОдо көп жылдар боюу эмгектенип кийин ардактуу эс алууга чыккан ИИОнун ардагери милициянын отставкадагы капитаны Турдалы Сулайманов азыркы учурда жардамга муктаж болуп жашай турган жери жок болгондугуна байланыштуу, ага көмөк көрсөтүү максатында 2021-жылдын 3-майында Ат-Башы РИИБнүн  кезексиз өткөрүлгөн ыкчам кеңешмесинде чечим чыккан. Бул чечимге ылайык Ат-Башы РИИБнин буга чейин  курулуп бүтпөй калган имаратын убактылуу турак жай кылып куруп,  кийин Ат-Башы РИИБнүн карамагындагы кызматтык турак жайы кылып  калтыруу үчүн буйрук чыгарылган.  Бул жерде үй салууга  Ат-Башы айылынын жергиликтүү бюджетинен 100 000 (жүз миң) сом акча каражаты которулуп берилген.  Мындан тышкары  Ат-Башы районундагы милициянын ардегерлери жана Ат-Башы РИИБнүн кызматкерлери демөөрчүлүк жардамдарын  көрсөтүшкөн. Милиция кызматкерлеринин өз күчү менен  салынган 2 бөлмөлүү үйдө  бүгүнкү күнү ИИОнун ардагери милициянын отставкадагы капитаны Турдалы Сулайманов жашап жатат. Ардагердин жашоосуна кайдигер карабай, жардам берген Ат-Башы районундагы ИИОнун  ардегерлерине жана Ат-Башы РИИБнүн кызматкерлерине ак сакал карыябыз терең ыраазычылыгын билдирип келүүдө. Бул жагымдуу саамалыкка себепкер болуп, карыябызды кубанычка бөлөгөн милиция кызматкерлери ИИМдин буйругу менен “Кыргыз милициясына 95 жыл” медалдары, “Кылмыш иликтөөгө 100 жыл” төш белгилери жана ардак грамоталар менен сыйланышты.

Мындан тышкары ардагерлер Нарын шааарындагы эң алдыңкы мектептердин бири болгон В.Чкалов жана Арыстанбек Буйлаш уулу атындагы  орто мектептердин мектеп администрациясы, жогорку класстын окуучулары менен жолугушуп, акыл-насааттары менен бөлүшүп, пикир алмашуу болуп, азыркы учурда болуп жаткан  жаш өспүрүмдөр арасындагы кылмыштуулук, суицид фактылары жана эрте никеге туруу боюнча кененирээк маалымат берилип, окуучулар кызыккан суроолорго толугу менен жообу берилип, иш-чара жогорку деңгээлде өткөрүлдү.

Ошондой эле “Карысы бардын ырысы бар”- дегендей карылардын күнүнө карата Нарын ОИИБнин өздүк курамдын атынан Нарын ОИИБнин ардагерлерине  азык-түлүк продуктулары алынып, Нарын ОИИБнин начальниги   А.Жумабеков ардагерлердин үйүнө барып жеринен тапшырып, жылуу калоолорун айтып келди.

 

Нарын ОИИБнин Басма сөз кызматы